من طرف قال الوداع !! وقلت صبرك دقيقـه ؟
ودّي ابيّـن حـزن قلبـي بقرطـاس
ما تدري أن البعـد أصعـب حقيقـه
لاصار قلبي بيـن هـمّ ٍ ووسـواس
اسمـع ونيـن القلـب ياللـي تعيقـه
وصدق المشاعر تشتكي حرّ الأنفـاس
لا مـا يعوّضنـي جمـال الخليـقـه
لا يا عديل الروح ما مثلـك اجنـاس
في غيبتك كثـر الصبـر مـا اطيقـه
والفرحه ابقربك أبد مـا لهـا قيـاس
كنـت افتكـر بـان العلاقـه وثيقـه
وادوّر الأعـذار واقـول لا بـاس !!
لكن خلاص اليـوم بالقلـب ضيقـه
ومات الأمل يوم ٍ ضوت نظرة الياس
تاه الفكـر وسـط البحـور العميقـه
ويغرق بها البحار لو كـان غطـاس
سيف الهجر من أمس واضح بريقـه
يومك قطعت الوصل واسقيتني كـاس
كـاس ٍ مليتـه مـن أنامـل رقيقـه
في داخله سم ّ ٍ وفي ظاهـره مـاس
في ضامري شبّيـت أكبـر حريقـه
وهدمت حبّ ٍ كان مبني على سـاس
هذا جوابـي والحبـر نَشْـف ريقـه
وما عاد فيك أمن الغلا شيء وإحساس
روّح وأنـا بـروح كـلّ بطريـقـه
بصبر على فرقاك لو كنت محتـاس
